22 de dezembro de 2010

O Galo (pasodobre)

Melodía de grande popularidade en todo o País e con numerosas letras, sendo a máis coñecida a que lle dá nome:

"O Galo cando canta é día,
imos de varanda,
imos todo o día"

Aquí recollemos a versión que desta peza fan Os Campaneiros.

17 de dezembro de 2010

Muiñeira do Molete

O nome "Molete" non é único desta muiñeira. Varias melodías distintas comparten esta mesma denominación, que fai referencia ao baile que acompaña. Dánzase cun molete de pan sobre a cabeza, de xeito moi similar ao que se adoita facer nas vodas coa regueifa.

En concreto, esta muiñeira formaba parte do repertorio da maioría dos gaiteiros d'A Coruña.

15 de dezembro de 2010

Danza de Ribadavia

Casto Sampedro (1848-1937) foi un importante avogado e musicólogo de Redondela, creador da Sociedade Arqueolóxica de Pontevedra. Esta Institución foi a primeira en recoller melodías populares de xeito científico e sistemático.

O Cancioneiro Musical de Galicia, amosa o traballo de toda unha vida dun grupo de persoas, centradas entorno ao bon facer de Casto Sampedro. Esta melodía é unha das interesantes danzas que se recollen nel.

13 de dezembro de 2010

Muiñeira

Peza orixinal de Xesús Vázquez Pedrares, gaiteiro d'Os Cinco de Galicia. Destaca a coherencia entre as partes, o que lle aporta unha unidade e unha beleza singulares.

5 de dezembro de 2010

Pasodobre de San Roque

O pasodobre máis bailado en Galiza. Os Irmáns Portela aprenderon esta peza d'Os Morenos de Lavadores, quen a tocaban nas festas de San Roque (Vigo) co nome de "Aires de Galicia". Ademais, como ben sabedes, Ricardo Portela foi alumno de Xosé Oliveira "O Moreno".

Os Dezas de Moneixas tamén empregaron algunha das melodías que contén este pasodobre.