Muiñeira

Os Dezas de Moneixas foron un conxunto de gaiteiros ben xenuíno. Formado case ao completo por membros dunha mesma familia e capitaneado por Xosé Benito González López, percorreron toda Galiza con melodías nosas, canto, baile e cadro de declamación. Devotos continuadores dos Coros Galegos, estiveron afiliados ao Partido Galeguista co que colaboraron activamente ata o golpe do 36.

"IRMANS: Cando queirades ter unha festa propia d'a Terra, non deixes de chamar os Gaiteiros 'OS DEZAS' de Lalín-Moneixas".

Mazurca dos Peruchos

Vigo e arredores gabáronse ao longo de todo o século XX de ter multitude de cuartetos cun variado repertorio.

Da parroquia de Castrelos, ademais de Airiños do Parque de Castrelos, destacan Os Peruchos con melodías ben interesantes, tal e como amosan nesta mazurca.

Muiñeira do Século XII

Xan Macías, orixinario de Viana do Bolo, veu para A Coruña onde formou parte d'Os Catro de Galicia. Orixinalmente tomaron este nome xa que os membros procedían de cadansúa provincia. Eles foron os predecesores do coñecido grupo Os Cinco de Galicia.

Logo de traballar para o Concello d'A Coruña, emigrou a Venezuela onde tocou con Castor Cachafeiro (un dos Gaiteiros de Soutelo) na Irmandade Galega de Caracas. Alí aprendeu esta muiñeira de tan chamativo nome, posto probabelmente polo propio Castor.

Valse de Vergara

Manuel López Vergara, gaiteiro de Ferrolterra, percorreu enchendo de música todas as parroquias da bisbarra co seu grupo familiar "Os Vergara". Tamén fixo parella gaiteira con Constantino Bellón no Coro Toxos e Froles, onde gravaron varios discos.

Do repertorio de seu destacamos este valse para que non fique no esquecemento, en contraste coa famosa rumba que leva o seu nome, bastante deturpada por grande parte dos gaiteiros.

Este valse moi probábelmente non fose orixinal para gaita, mais si adaptado, pois ao final da primeira parte presenta un salto que denota exceder a tesitura.

Pasacorredoiras de Ponteareas

Outra bela xoia do Cancioneiro Musical de Galicia, que revela o excelente traballo e o seu amor por Galiza de Casto Sampedro e da Sociedade Arqueolóxica de Pontevedra.

Muiñeira da Xunqueira

A Xunqueira é un barrio de Viveiro, lugar de onde procede esta peza. O único dato do que se ten constancia é unha gravación de 1968, a cargo do Grupo de Danzas da Sección Femenina de Viveiro.

Tamén foi interpretada pola meirande parte dos cuartetos coruñeses durante a segunda metade do século XX, moi probábelmente a raíz de escoitar a citada gravación.

Pasodobre de Pousada

Manuel, alcumado "Atilano", é un gaiteiro de Pousada (Sobrado dos Monxes) que sempre tocou con gaitas grileiras. Como a meirande parte dos gaiteiros a súa aprendizaxe foi autodidacta, comezando aos doce anos co punteiro mentres acompañaba o gando.

Aínda que a denominación orixinal sexa "pasodobre", a peza é un pasacorredoiras. Recollida polo Colectivo Ruote.