31 de outubro de 2010

Muiñeira Mariñana

Esta muiñeira, integrada en cáseque todos os repertorios dos grupos das Mariñas, moitas alegrías ten dado ao ser interpretada polos cuartetos en alboradas e romarías. Tamén serve de base aos mestres de baile para lles ensinar os primeiros puntos aos seus pupilos.

28 de outubro de 2010

Valse de Taramundi

Xosé Manuel Seivane é dobremente gaiteiro: gaiteiro intérprete e gaiteiro construtor. Toda unha vida adicada ao instrumento de noso. É por isto que as gaitas da súa manufactura están presentes en todo o mundo.

Tomamos do seu repertorio este sinxelo e fermoso valse da parte oriental de Galiza.

27 de outubro de 2010

Muiñeira de Outeiro

Esta muiñeira contén fraseos que, con lixeiras variacións, están presentes noutras pezas de repertorios distintos. Isto é algo habitual, especialmente cando unha melodía ten éxito entre os gaiteiros.

26 de outubro de 2010

Ao saír para a romaría (xota)

A xota galega flúe en constante ligazón coa foliada, por iso moitos dos seus fraseos convidan a seren asubiados, moi melodiosos, cantábiles.

Tal é o caso desta peza, cuxo título xa o di todo: alegre e vivaz, propia para troulear nun día de romaxe.

25 de outubro de 2010

Muiñeira do Olvido

O gaiteiro a través do seu instrumento é quen de poñerlle música aos sentimentos máis fondos.

Henrique Ambite deu boa mostra disto ao compoñer esta muiñeira para o pasamento dun amigo seu.

24 de outubro de 2010

Mazurca

Os Areeiras de Catoira, que orixinalmente tocaban esta mazurca con dúas partes, viron con bos ollos engadirlle outra (a primeira), proposta por Xosé Vicente Ferreirós.

23 de outubro de 2010

Reviravolta (muiñeira)

Outra vivaz composición de Nazario González Iglesias, "Moxenas". Propia para ser tocada con gaita e tamboril.

22 de outubro de 2010

Polca do Bliadoiro

Máis unha peza d'Os Areeiras.

No remate é a segunda voz a que fica na nota RE.

8 de outubro de 2010

Muiñeira do Carballal

Melodía popular en todo o Courel. Reparade ben nos silencios entre as partes.

3 de outubro de 2010

Pasodobre de Guisoi

Outra peza do repertorio dos Areeiras. Este é un dos seus temas máis coñecidos.